“IV Aqrar Startaplar və İnnovasiya Forumu” çərçivəsində "INNOLAND" İnkubasiya və Akselerasiya Mərkəzi də stendlə təmsil olunaraq iştirakçılara mərkəzin fəaliyyəti, startaplara təqdim olunan dəstək mexanizmləri və innovasiya yönümlü proqramlar barədə ətraflı məlumat təqdim edib.

Forum çərçivəsində "İnnovasiyalar Mərkəzi"nin direktoru Vüsal Rüstəmov sərgi zonası ilə tanış olub, aqrar və digər sahələr üzrə fəaliyyət göstərən startapların innovativ layihələri, tətbiq etdikləri texnologiyalar və təqdim etdikləri həllərlə yaxından maraqlanıb. O, startap nümayəndələri ilə görüşərək onların fəaliyyəti, inkişaf mərhələləri və gələcək planları barədə məlumat alıb, innovativ təşəbbüslərin inkişafının və ekosistemə inteqrasiyasının əhəmiyyətini vurğulayıb.

Forum zamanı aqrar və digər klasterlər üzrə fəaliyyət göstərən startaplara göstərilən inkubasiya, akselerasiya, mentorluq və ekosistemə inteqrasiya xidmətləri ziyarətçilərə çatdırılıb, həmçinin potensial əməkdaşlıq imkanları müzakirə olunub.

Həmçinin, yerli şirkət nümayəndələri tərəfindən kənd təsərrüfatı təyinatlı pilotsuz uçuş aparatları, zərərvericilərin populyasiyasını müəyyən edən iqlim stansiyaları və digər innovativ texnoloji həllər barədə təqdimatlar keçirilib, müasir aqrar texnologiyaların tətbiqi və bu sahədə innovativ fəaliyyət istiqamətləri iştirakçıların diqqətinə çatdırılıb.

Qeyd edək ki, "INNOLAND" İnkubasiya və Akselerasiya Mərkəzi forumun tərəfdaşlarından biri kimi prosesdə fəal iştirak edib. Mərkəzin əməkdaşları forum çərçivəsində təşkil olunan bootcamp proqramlarında mentor qismində iştirak edərək startapçılara praktiki bilik və təcrübələrini bölüşüb, müxtəlif mövzularda təlimlər keçirərək onların ideyalarının inkişafına dəstək göstəriblər.

 “Strategiya və Maliyyə” butkampı start götürdü.

Butkampın ilk dərsi peşəkar məsləhətçi Dr. İbrahim Can tərəfindən keçirildi.

“Startap, marketinq və strategiya” mövzusuna həsr olunan təlimdə aşağıdakı istiqamətlər üzrə məlumatlar təqdim olundu:

 Startap ekosistemi və strateji hədəflər 

Bazarda düzgün mövqelənmə 

Effektiv marketinq planlaması

Təlim interaktiv müzakirələr və sual-cavab sessiyası ilə yekunlaşdı.

"Ön toxum və toxum mərhələsi üzrə investisiyaya hazırlıq" proqramına qeydiyyat başladı.

Proqramın məqsədi artıq məhsulu və ilk ödənişli müştəriləri olan startapları qısa müddətdə investisiyaya hazır vəziyyətə gətirmək və seçilmiş VC-lərlə birbaşa əlaqələndirməkdir. Proses fərdi mentorluq, dərin analitik yanaşma və AnalyzeWare platforması dəstəyi ilə həyata keçiriləcək. Seçiləcək cəmi 5 startap proqram çərçivəsində 2-4 həftə ərzində investisiya dəyərləndirməsi, maliyyə yanaşması və strategiyasını formalaşdıracaq. Xüsusi olaraq, seçilən startaplar heç bir üzvlük haqqı ödəmədən iştirak edəcək və AnalyzeWare Strategy paketindən 12 ay tam pulsuz istifadə hüququ qazanacaq.

Son müraciət tarixi: 14.02.2026,

Qeydiyyat linki: https://forms.gle/BQBJ9fuxJoMU8TSr7

OBA SİD layihəsi uğurla davam edir!

"OBA" marketlər şəbəkəsinin layihəsi olan "Startap, İnnovasiya və Dəstək“ proqramı çərçivəsində "INNOLAND” İnkubasiya və Akselerasiya Mərkəzinin dəstəyi ilə “Sənin ideyan dəstəklənir” şüarı altında növbəti təlimlər baş tutub. Bu dəfə iştirakçılar startap üzrə ekspert Mübariz Şahbazlı tərəfindən “Pitch deck hazırlanması” və “Təqdimat bacarıqlarının inkişafı” mövzularında praktiki biliklər əldə ediblər.

Təlimlər zamanı iştirakçılara investorlara yönəlik effektiv təqdimat quruluşunun hazırlanması, ideyanın aydın və inandırıcı şəkildə ifadə olunması, eləcə də çıxış bacarıqlarının gücləndirilməsi ilə bağlı faydalı tövsiyələr verilib.

"INNOLAND"in rezidenti "Enverson AI" Dayaq” mükafatına layiq görülüb!

İqtisadiyyat Nazirliyinin dəstəyi və Kiçik və Orta Biznesin İnkişafı Agentliyinin təşkilatçılığı ilə “Güc biznesindir” devizi ilə “Dayaq” mükafatının təqdim olunması mərasimi keçirilib. 2025-ci il üzrə iqtisadiyyatın müxtəlif sektorlarında çalışan ən fəal sahibkarlar mükafatlandırılıb. Tədbir çərçivəsində rəsmi şəxslərin çıxşları, “2026: KOB-ların çağırışı” mövzusunda panel müzakirə, 2025-ci ildə uğur qazanmış 17 sahibkarlıq subyektinə “Dayaq” mükafatları təqdim edilib. Mükafat alan startaplar sırasında "INNOLAND" İnkubasiya və Akselerasiya Mərkəzinin rezidenti "Enverson AI" da yer alıb. “Dayaq” mükafatının məqsədi iqtisadiyyatın dayağı olan sahibkarların uğurlarının cəmiyyətə daha geniş tanıdılması, biznes düşüncə tərzinin təşviqi və dövlət-özəl sektor arasında əməkdaşlığın daha da möhkəmləndirilməsidir. "Enverson AI" komandasını təbrik edir və daha böyük uğurlar arzulayırıq!

"INNOLAND"in rezidenti "Digital Startup Awards 2025"də uğurla təmsil olunub!

12-13 dekabr tarixində Daşkənd şəhərində Özbəkistan Respublikasının Rəqəmsal Texnologiyalar Nazirliyi, "IT Park Uzbekistan" və "IT Park Ventures"in birgə təşkilatçılığı ilə beynəlxalq "Digital Startup Awards" proqramının böyük finalı keçirilib. Mərkəzi Avrasiya regionunun ən iri startap təşəbbüslərindən biri olan proqramın ümumi mükafat fondu 1 milyon ABŞ dolları təşkil edib. İnkubasiya proqramı üzrə isə Azərbaycanı təmsil edən rezident startapımız "Lingozy" 10 min ABŞ dolları məbləğində mükafat əldə edib. Qeyd edək ki, Azərbaycandan qatılan startaplar ümumilikdə 70 min ABŞ dolları məbləğində qrant qazanıblar. Akselerasiya proqramı üzrə "Recepta" startapı 50 min ABŞ dolları, İnkubasiya proqramı üzrə "SnackPack AZ" startapı 10 min ABŞ dolları mükafat əldə ediblər. Bundan əlavə, "Best Startup Project" kateqoriyası üzrə final mərhələsinə Azərbaycanı "StarkidStories" və "Tryverse" startapları təmsil edib. İnkubasiya proqramında iştirak haqqı qazanmış digər Azərbaycan startapları isə "Crable", "himate.az" və "OLSUN" olub. "Digital Startup Awards" proqramı regional startap ekosistemləri arasında əməkdaşlığı gücləndirərək Azərbaycan startaplarının beynəlxalq miqyasda tanınmasına və yeni inkişaf imkanları əldə etməsinə töhfə verib.

"ASAN xidmət" “Take Off İstanbul 2025” startap sammitində

10–11 dekabr 2025-ci il tarixində Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “İnnovasiyalar Mərkəzi”nin nümayəndə heyəti Türkiyə Respublikasının İstanbul şəhərində keçirilən “Take Off İstanbul 2025” beynəlxalq startap sammitində iştirak edib.

“ASAN xidmət”in tərəfdaşı olduğu tədbirdə ölkəmiz Azərbaycan stendi ilə təmsil olunub. Stenddə “İnnovasiyalar Mərkəzi”, ASAN AI Hub, "INNOLAND” İnkubasiya və Akselerasiya Mərkəzinin rezident startapları və yerli innovasiya ekosistemini təmsil edən perspektivli startaplar - “Enverson AI”, “Convitsa”, “Polygraf AI”, “Speakday”, “IOMETE”, “Qmeter”, “Tryverse” və “StarKidStories” təqdim edilib.

İki gün davam edən sammit çərçivəsində Azərbaycan stendi “Baykar” şirkətinin texniki direktoru Selçuk Bayraktar, “Take Off Girişim” Zirvəsinin direktoru İrem Bayraktar Aksakal, habelə investorlar və innovasiya ekosisteminin digər əsas iştirakçıları tərəfindən ziyarət edilib. Startapların fəaliyyəti ilə yaxından tanışlıq olub, qarşılıqlı əməkdaşlıq imkanları müzakirə edilib.

Tədbirin ikinci günü “İnnovasiyalar Mərkəzi”nin direktoru Vüsal Rüstəmov “Take Off İstanbul 2025” çərçivəsində təşkil olunan “Regional startap ekosistemi: Azərbaycan, Banqladeş, Türkiyə” mövzusunda panel müzakirəsində çıxış edib.

Bu il “Take Off İstanbul” sammiti 40 ölkədən 500-dən çox startapı, 250-dən artıq investoru, 75 maraqlı tərəfi və 11 sponsor təşkilatı bir araya gətirib.

Sammit TEKNOFEST çərçivəsində T3 Fondu, Türkiyə Respublikasının Sənaye və Texnologiya Nazirliyi və Prezident Administrasiyasının İnvestisiya və Maliyyə Ofisinin təşəbbüsü ilə təşkil olunaraq regionun ən genişmiqyaslı innovasiya və startap platformalarından biri kimi fəaliyyət göstərir.

Bu platforma innovasiyaların inkişafı üçün əlverişli və maneəsiz mühit formalaşdırmaq məqsədilə sahibkarları, mentorları, vençur kapitalı nümayəndələrini və şirkətləri bir araya gətirir.