“DIGIAGE – Bakı 2025” rəqəmsal oyun düşərgəsi davam edir!

Düşərgənin 2-ci günündə iştirakçılar müxtəlif təlimlərdə iştirak edib, həm nəzəri biliklər əldə edir, həm də artıq öz oyunlarını kodlamağa başlayıblar.

Rəqəmsal oyun sənayesinə maraq göstərən gənclər komandalar şəklində çalışaraq mentorların dəstəyi ilə layihələrini inkişaf etdirirlər.

“DIGIAGE - Bakı 2025” rəqəmsal oyun düşərgəsinə start verildi!

“İnnovasiyalar Mərkəzi” və “Bilişim Vadisi DIGIAGE”nin birgə təşkilatçılığı ilə keçirilən düşərgədə 238 müraciətçi arasından seçilən 100 iştirakçı komandalar şəklində öz rəqəmsal oyunlarını yaradacaqlar.

Bütün iştirakçılara uğurlar arzulayırıq!

Fintex startapları üçün “Xüsusi tənzimləmə rejimi” mövzusunda görüş keçirildi

Azərbaycan Respublikasının Mərkəzi Bankı və “INNOLAND” İnkubasiya və Akselerasiya Mərkəzinin birgə təşkilatçılığı ilə fintex ekosistemi üçün mühüm əhəmiyyət daşıyan “Xüsusi tənzimləmə rejimi” mövzusunda görüş uğurla keçirildi.

Təqdimat zamanı xüsusi tənzimləmə rejiminin məqsədi, müraciətlərin qiymətləndirilməsi meyarları və sınaq prosesi ilə bağlı ətraflı məlumatlar təqdim olunaraq bu istiqamətdə geniş müzakirələr aparılıb. Sessiya fintex sahəsində fəaliyyət göstərən startaplar üçün həm maarifləndirici, həm də praktiki baxımdan faydalı müzakirələrlə yadda qaldı.

Spikerlər:

• Sahib Həsənov – Azərbaycan Respublikasının Mərkəzi Bankı, şöbə rəisi

• Vaqif Quliyev – Azərbaycan Respublikasının Mərkəzi Bankı, aparıcı mütəxəssis

Görüşdə fintex ekosistemi üçün mövcud imkanlar, normativ tələblər, innovasiyaların tənzimlənməsi və gələcək əməkdaşlıq perspektivləri ətrafında geniş fikir mübadiləsi aparıldı. İştirakçılar üçün sual-cavab sessiyası da təşkil olundu və sahə üzrə aktual məsələlər ətraflı şəkildə izah edildi.

“OBA” marketlər şəbəkəsinin layihəsi olan “Startap, İnnovasiya və Dəstək” proqramı çərçivəsində İnnovativ Həllər Marafonuna start verildi.

Marafonun ilk həftəsinin açılış tədbiri INNOLAND İnkubasiya və Akselerasiya Mərkəzinin dəstəyi ilə mərkəzin binasında baş tutdu. Tədbirdə iştirakçı komandalar, mentorlar və layihə rəhbərləri yer aldı.

İlk olaraq proqramın yol xəritəsi təqdim edildi, daha sonra mentorlarla “SpeedDate” formatında görüşlər keçirildi.

Tədbirin davamında INNOLAND İnkubasiya və Akselerasiya Mərkəzinin rəhbəri Nicat Əmiraslanov tərəfindən “İdeya generasiyası, innovasiya və yaradıcılıq” mövzusunda proqramın ilk təlimi keçirildi.

"ASAN xidmət"in "INNOLAND" mərkəzi Web Summit 2025-də

10-13 noyabr 2025-ci il tarixində Portuqaliyanın Lissabon şəhərində keçirilən “Web Summit 2025”də “INNOLAND” İnkubasiya və Akselerasiya Mərkəzinin rezidentləri "Tada!" və "Enverson" startapları ölkəmizi təmsil ediblər.

Tədbir çərçivəsində “İnnovasiyalar Mərkəzi”nin direktoru Vüsal Rüstəmov INNOLAND-in fəaliyyəti, ekosistemə verdiyi töhfələr və rezident startapların layihələri barədə iştirakçılara məlumat verib.

“INNOLAND” İnkubasiya və Akselerasiya Mərkəzi”nin dəstəyi ilə “Sənin ideyan dəstəklənir” şüarı altında həyata keçirilən SİD layihəsinin açılış mərasimi keçirilib.

SİD layihəsi yaradıcı təşəbbüslərin inkişafına təkan verməklə yanaşı, OBA-da əməliyyatların optimallaşdırılmasına, innovativ həllərin tətbiqinə və ümumilikdə Azərbaycanın startap ekosisteminin şaxələndirilməsinə xidmət edir.

Açılış mərasimində Veysəloğlu Şirkətlər Qrupunun rəhbər şəxsləri və Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “İnnovasiyalar Mərkəzi”nin direktoru Vüsal Rüstəmov iştirak ediblər.

Vüsal Rüstəmov sözügedən layihə ilə bağlı bildirib ki, seçilmiş 33 startap üçün effektiv inkubasiya mühitinin formalaşdırılması məqsədilə "İnnovasiyalar Mərkəzi" öz resurslarını paylaşmağa hazırdır. Bu əməkdaşlıq dövlət və özəl sektor tərəfdaşlığının parlaq nümunəsidir və biz OBA-nın təşəbbüsünü yüksək qiymətləndiririk.

Qeyd edək ki, müvafiq layihəyə ümumilikdə 183 komanda müraciət edib. Onların arasından 33 ən perspektivli komanda növbəti mərhələyə seçilib.

Layihə çərçivəsində ümumilikdə 10,000 manatlıq mükafat fondu nəzərdə tutulub.

“INNOLAND” İnkubasiya və Akselerasiya Mərkəzinin dəvəti ilə regionun ən tanınmış sahibkarlarından biri, “Yemeksepeti.com”un qurucusu və keçmiş icraçı direktoru Nevzat Aydın ilə onlayn görüş keçirilib.

Görüşdə “INNOLAND” rezidentləri “Tada!” və “Enverson” startapları layihələrini təqdim ediblər. Müzakirələrdə əməkdaşlıq və investisiya imkanları dəyərləndirilib, növbəti mərhələdə əlaqələrin davam etdirilməsi planlaşdırılır.

Azərbaycanda “Rəqəmsal Startap Mükafatları” müsabiqəsinin yarımfinal mərhələsi keçirilib

“İNNOLAND” İnkubasiya və Akselerasiya Mərkəzi”nin və “Sabah Hub”ın tərəfdaşlığı ilə “Rəqəmsal Startap Mükafatları” beynəlxalq müsabiqəsinin “Ən Yaxşı Startap Layihə” kateqoriyası üzrə Azərbaycan yarımfinalı uğurla baş tutub.

Yarımfinal mərhələsində ölkəmizi təmsil edən 20 innovativ startap layihəsi iştirak edib. Startap komandaları layihələrini münsiflər heyətinə təqdim edərək biznes modelləri, texnoloji yenilikləri və bazar potensialı kimi meyarlar üzrə qiymətləndirilib.

“Rəqəmsal Startap Mükafatları” proqramı regionun startap ekosistemində çoxpilləli inkişaf mexanizmini formalaşdıran, mərhələli seçim sistemi ilə fərqlənən beynəlxalq təşəbbüsdür. Proqramın üç əsas mərhələsindən biri olan “Ən Yaxşı Startap Layihə” kateqoriyası üzrə iki layihə — “StarKidsStories” və “Tryverse” qalib elan edilib.

“StarKidsStories” süni intellekt texnologiyalarına əsaslanaraq fərdiləşdirilmiş uşaq hekayə kitabları yaradan innovativ startapdır. Layihə miqyaslana bilən modeli və yüksək mənfəət potensialı ilə seçilir.

“Tryverse” isə fiziki məhsulların onlayn satışını artırmaq məqsədilə 3D və artırılmış reallıq (AR) texnologiyalarını birləşdirən platformadır.

Bu iki startap layihəsi Özbəkistanda keçiriləcək beynəlxalq final mərhələsində 9 ölkədən olan ən perspektivli startaplarla mübarizə aparmaq imkanı qazanıb.

Startaplar yarımfinal mərhələsi üçün təxminən 100-ə yaxın müraciət arasından seçilib və nüfuzlu münsiflər heyəti üzvləri və ekspertlər tərəfindən qiymətləndirilib. Qiymətləndirmədə aşağıdakı şəxslər iştirak ediblər:

İT Park Ventures-in direktor müavini Dalerkhon Nodirov,

UNEC Startap İnkubatorunun rəhbəri Mübariz Şahbazlı

 Sabah Fondu adından investisiya mütəxəssisi Məsud Alisoy.

Bundan əlavə, INNOLAND İnkubasiya və Akselerasiya Mərkəzini təmsil edən Akademi Group-un icraçı direktoru Elşad Məmmədzadə EdTech startaplarını təhsil innovasiyaları üzrə ekspert münsif kimi dəyərləndirib.

Ümumilikdə müsabiqəyə Azərbaycan üzrə 150-dən çox startap müraciət edib. “Rəqəmsal Startap Mükafatı” proqramı “IT Park Özbəkistan”ın innovasiya platforması "StartupBase" tərəfindən təşkil olunur. Proqramın məqsədi Mərkəzi Asiya və Qafqaz regionlarında rəqəmsal innovasiyaları təşviq etmək, startap ekosisteminin inkişafına dəstək vermək və gənc sahibkarların beynəlxalq səviyyədə tanınmasına şərait yaratmaqdır.

 Qeydiyyat üçün sayılı günlər qaldı! “DIGIAGE - Bakı 2025” rəqəmsal oyun düşərgəsində yerini indi tut!

 Oyun dizaynı, proqramlaşdırma və marketinq sahəsində bacarıqlarını sınamaq, real layihələrdə iştirak edib peşəkarlarla işləmək fürsətini qaçırma!

Qeydiyyat: forms.gle/aVtVRL7Ah966Yrm18

Son tarix: 31 oktyabr