19 İyun, 2020

Suya qənaət mövzusunda hakaton keçiriləcək

Ekologiya və Təbii Sərvətlər Nazirliyi və BMT-nin İnkişaf Proqramı (BMTİP) mövcud su problemlərinə texnoloji həllər tapmaq və suyun həyati əhəmiyyəti ilə bağlı maarifləndirmə işinə dəstək vermək məqsədilə “Hackathon Azerbaijan” komandası ilə birgə Azərbaycanda su mövzusunda keçirilən ilk virtual hakatona start verir.
  
Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin "INNOLAND" İnkubasiya və Akselerasiya Mərkəzinin də dəstəkçisi olduğu “Aquahack” innovatorları, proqramçıları, şirkətləri, vətəndaş cəmiyyəti təşkilatlarını, eləcə də, 13 yaşdan yuxarı ən fəal icma üzvlərini suyun kəmiyyət və keyfiyyətinin qorunması və su ehtiyatlarına təzyiqlərin azadılması üçün texnoloji ideyalar və həllər təklif etməyə dəvət edir.
 
Məsələn, Azərbaycanda ən çox su itkisinə kortəbii suvarma təcrübəsi səbəb olur ki, bu  sahədə təklif ediləcək ideyalar qənaətcil, çevik və innovativ suvarma üsullarından istifadəni sövq edəcək.
 
Problemin həlli istiqamətində təklif ediləcək ideyalar fermerləri torpaq və meteoroloji məlumatlardan optimal şəkildə istifadəni təmin edən yeni suvarma üsulları ilə tanış etməklə bağlı ola bilər.
 
Digər həllərə ev şəraitində sudan qənaətlə istifadəyə dair yeni ictimai məlumatlandırma metodları aid edilə bilər.
 
“Aquahack” yarışmasına qeydiyyat 10-25 iyun tarixlərində keçiriləcək və hakatonda iştirak tamamilə ödənişsizdir. Müraciətlər həm fərdi, həm də qrup şəklində təqdim oluna bilər. Müraciət prosesi bitdikdən sonra iştirakçıları konkret problemlər və mövzu ilə ətraflı tanış etmək məqsədilə silsilə vebinarlar təşkil olunacaq. Bütün ideya və təkliflər ixtisaslaşmış münsiflər heyəti tərəfindən qiymətləndiriləcək.
 
Ümumilikdə 3 mükafat təqdim olunacaq: birinci yer üçün 5000 manat, ikinci yer üçün 3000 manat və üçüncü yer üçün 2000 manat.
 
Son müraciət tarixi: 25 iyun 2020-ci il

Qeydiyyat  üçün: https://aquahack.hackathon.az/  

Ətraflı oxu

Digər xəbərlər

innoland news image

“Milyon dollarlıq satış: Amazon vs E-ticarət saytı” mövzusunda müzakirələr aparılıb

“Milyon dollarlıq satış: Amazon vs E-ticarət saytı” mövzusunda müzakirələr aparılıb

“StartupFest 2019” çərçivəsində keçirilən “World E-Commerce Eurasia 2019 Baku Forum” tədbirində “Milyon dollarlıq satış: Amazon vs E-ticarət saytı” adlı panel sessiya təşkil olunub.

Bu paneldə e-ticarət, e-ticarət saytları arasındakı rəqabət və onların qlobal bazarda uğur qazanması mövzusunda zəruri olan elementlər əhatə olunub.

Sessiyada “Moughe Gourmet”in İcraçı direktoru Müge Ergüleç, “World E-Commerce Forum”un Təlim-Tədris mərkəzinin rəhbəri Orxan İsayev, “Sefa Merve”nin İcraçı direktoru Mehmet Metin Okur çıxış ediblər.

Sessiyanın moderatoru “INNOLAND” İnkubasiya və Akselerasiya Mərkəzinin müdiri Məmməd Kərimov olub.

Ətraflı oxu
innoland news image

“Hackathon” Şamaxı uğurla başa çatdı!

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “INNOLAND” İnkubasiya və Akselerasiya Mərkəzinin təşkilatçılığı ilə Şamaxıda “Hackathon” uğurla başa çatıb.

Tədbirin ilk günündə iştirakçılar “Startap nədir?”,  “Startap ideyasını necə formalaşdırmaq olar?”,  “Bazar araşdırması”, “Təqdimat bacarıqları” kimi əsas təşəbbüskarlıq anlayışları ilə tanış ediliblər.  

Növbəti gün iştirakçılar komandalara bölünərək onlara həvalə edilmiş layihələr üzrə “Hackathon” zamanı əldə etdikləri bilikləri tətbiq etməyə çalışıblar.

Münsiflər heyətinin qarşısında öz layihələrini təqdim edən 5 komandadan “İqor” komandası ən yüksək bal toplayaraq qalib olub.

Sonda qalib komandalar Şamaxı "ASAN xidmət"də yerləşən “INNOLAND” İnkubasiya və Akselerasiya Mərkəzində 6 aylıq inkubasiya proqramı keçmək haqqı qazanıblar. Bununla yanaşı qalib komandaların təsisçiləri 2020-ci ildə Türkiyədə keçiriləcək “Startup Turkey” tədbirinə qatılmaq şansı əldə ediblər.

Şamaxı şəhərində “Hackathon”un keçirilməsində məqsəd region gəncləri arasında startapların təşviqi, mövcud ideyaların dəstəklənməsidir.

Ətraflı oxu
innoland news image

Maliyyə Bazarlarına Nəzarət Palatasının dəstəyilə Bank Respublika və “INNOLAND” fintex-startaplar üçün innovativ layihəyə başlayır

“Bank Respublika” ASC və Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “INNOLAND” İnkubasiya və Akselerasiya Mərkəzi, Azərbaycan Respublikası Maliyyə Bazarlarına Nəzarət Palatasının dəstəyi ilə ölkədə ilk dəfə olaraq fintex-startuplar üçün “Open Banking Lab” layihəsinə başlayır. 16 həftə davam edəcək layihə çərçivəsində fintex-startapçılar fərdi və ya komanda şəklində öz ideyalarını təqdim edə biləcəklər. İlkin seçmə mərhələləsini keçən fintex-startuplar inkubasiya proqramında iştirak edərək qabaqcıl ekspertlərin iştirakı ilə təlim keçə biləcəklər. Eyni zamanda, fərqlənən iştirakçılara ölkədə ilk dəfə olaraq “Bank Respublika” ASC-nin maliyyə xidmətlərinə qoşulmaq üçün test rejimində olan Açıq API interfeysinə çıxış veriləcəkdir.

Açıq API (Open API) - müştərilərə bank xidmətlərini bankdankənar servislər, məsələn, ödəniş platformaları və ya onlayn kredit platformaları vasitəsilə əldə etmək imkanı verən bir mexanizmdir. Açıq API vasitəsilə developerlər bank müştəriləri üçün müştəri yönümlü və onların ehtiyaclarını qarşılayan proqram və xidmətlər yarada biləcəklər.

Maliyyə Bazarlarına Nəzarət Palatasının dəstəyi ilə “Bank Respublika” ASC tərəfindən ölkədə ilk dəfə olaraq test rejimində Açıq API laiyhəsinin bu cür təqdim edilməsi banklarla fintexlər arasında qarşılıqlı əməkdaşlığın möhkəmlənməsi, qabaqcıl beynəlxalq təcrübənin ölkəmizdə tətbiqi imkanlarının qiymətləndirilməsi baxımından mühüm əhəmiyyət kəsb edir.

Ətraflı oxu