Süni intellekt əsaslı startaplar üçün xüsusi imkan – "NVIDIA Inception Proqramı" ilə bağlı infosessiya!

"StrategEast"in təşkilatçılığı və "INNOLAND"in icma tərəfdaşlığı çərçivəsində keçiriləcək bu onlayn sessiyada süni intellekt sahəsində fəaliyyət göstərən erkən və inkişaf mərhələsindəki startaplar üçün "NVIDIA Inception Proqramı"nın təqdim etdiyi dəstək və fürsətlər haqqında ətraflı məlumat veriləcək.

Sessiya çərçivəsində iştirakçılar proqrama üzv olmaq qaydaları, təqdim olunan bulud kreditləri və texniki resurslar, mentorluq və təlim imkanları, eləcə də qlobal "NVIDIA" ekosistemində tanınmaq yolları ilə tanış olacaqlar.

Andrei Golfeto – "NVIDIA Inception"nın İcma meneceri

30 iyul, 17:00, Görüş online baş tutacaq!

Qeydiyyat: https://t1z9b.share.hsforms.com/2Rd2JrZl6RDiMYEISnwd1zg

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin "INNOLAND" İnkubasiya və Akselerasiya Mərkəzində keçirilən "GIC Innovation Akselerasiya (iX) Proqramı" təlimləri başa çatıb.

18 mart tarixində proqram iştirakçılarının proqram ərzində əldə etdikləri bilikləri tətbiq edərək ərsəyə gətirdikləri startapların təqdimatı baş tutub.
Təqdimat Azərbaycan Respublikası Nazirlər Kabineti yanında operativ qərargahın və Ümumdünya Səhiyyə Təşkilatının məsləhətlərinə uyğun olaraq koronavirus səbəbi ilə virtual qaydada həyata keçirilib. Belə ki, təqdimatçılar ərsəyə gətirdikləri startapları onlayn olaraq Azərbaycan və Amerikadan tədbirə qoşulmuş münsiflər heyətinə təqdim ediblər.

Stanford Universitetinin təcrübəli mütəxəssisləri tərəfindən tədris olunan 8 həftəlik proqramda tələbələr, təşəbbüskarlar, orta və böyük şirkət rəhbərləri iştirak ediblər. Təlimlərdə Silikon Vadisinin təcrübəsi ilə yanaşı yerli mövzulara uyğun mentorluq və dünya səviyyəli vörkşopların təcrübələrindən də istifadə edilib.

"GIC Innovation Akselerasiya (iX) Proqramı" Stanford Universitetinin "İdeyadan biznesə professional inkişaf" kurikulumu əsasında keçirilən 8 həftəlik proqramdır. Bu unikal proqram startaplarda, şirkətlərdə və dövlət orqanlarında məhsul və biznesin inkişafı üçün innovativ düşüncə formalaşdırır, yerli ekosistemin inkişafı üçün qlobal resurslara çıxışı təmin edir.

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “INNOLAND” İnkubasiya və Akselerasiya Mərkəzinin təşkilatçılığı ilə Şamaxıda “Hackathon” uğurla başa çatıb.

Tədbirin ilk günündə iştirakçılar “Startap nədir?”,  “Startap ideyasını necə formalaşdırmaq olar?”,  “Bazar araşdırması”, “Təqdimat bacarıqları” kimi əsas təşəbbüskarlıq anlayışları ilə tanış ediliblər.  

Növbəti gün iştirakçılar komandalara bölünərək onlara həvalə edilmiş layihələr üzrə “Hackathon” zamanı əldə etdikləri bilikləri tətbiq etməyə çalışıblar.

Münsiflər heyətinin qarşısında öz layihələrini təqdim edən 5 komandadan “İqor” komandası ən yüksək bal toplayaraq qalib olub.

Sonda qalib komandalar Şamaxı "ASAN xidmət"də yerləşən “INNOLAND” İnkubasiya və Akselerasiya Mərkəzində 6 aylıq inkubasiya proqramı keçmək haqqı qazanıblar. Bununla yanaşı qalib komandaların təsisçiləri 2020-ci ildə Türkiyədə keçiriləcək “Startup Turkey” tədbirinə qatılmaq şansı əldə ediblər.

Şamaxı şəhərində “Hackathon”un keçirilməsində məqsəd region gəncləri arasında startapların təşviqi, mövcud ideyaların dəstəklənməsidir.