“INNOLAND”in dəstəyi ilə “HER IT Journey 3” layihəsinin final mərhələsi uğurla başa çatdı

2025-ci il 24 iyun tarixində “INNOLAND” İnkubasiya və Akselerasiya Mərkəzinin dəstəyi ilə mərkəzin rezident startapı olan “SAFAVY” MMC tərəfindən icra edilən “HER IT Journey 3” layihəsinin rəsmi final tədbiri keçirilib.

Layihə çərçivəsində 15 mart–15 iyun tarixlərini əhatə edən dövrdə Azərbaycanın müxtəlif regionlarından seçilmiş 20 xanım iştirakçıya “Rəqəmsal marketinq və brendləşdirmə”, “Qrafik dizayn” və yumşaq bacarıqlar üzrə hibrid formatda təlimlər təqdim olunub. Proqram boyunca iştirakçılar həmçinin sahə üzrə tanınmış mütəxəssislərlə görüşlər və təcrübə mübadiləsi imkanları əldə ediblər.

“HER IT Journey” təşəbbüsü növbəti dəfə regionlarda yaşayan, sosial həssas qruplara aid olan və ya sahibkarlıqla məşğul olan qadınların rəqəmsal bacarıqlarını inkişaf etdirməyə, onları İKT sektoruna daha fəal şəkildə inteqrasiya etməyə hədəflənib.

Qeyd edək ki, “SAFAVY” MMC ölkədə Startap şəhadətnaməsi ilə təltif olunmuş ilk yerli təhsil platforması olaraq, artıq 4 ildən çoxdur fəaliyyət göstərir. “HER IT Journey” layihəsi şirkətin qadınların texnologiya sahəsində fəal iştirakını təşviq edən ardıcıl və təsirli sosial təşəbbüslərindən biridir. Layihənin həyata keçirilməsinə PAŞA Holdinqin maliyyə dəstəyi mühüm töhfə verib.

Gənclərin 2-ci Şəbəkələşmə forumu baş tutub

31 avqust 2025 tarixində "INNOLAND" İnkubasiya və Akselerasiya mərkəzində “Gənclər Dayanıqlı İnkişaf Məqsədləri naminə: Gənclərin ikinci Şəbəkələşmə Formu" açılış mərasimi ilə başlayıb. Tədbir Azərbaycan Respublikasının Dövlət Himni ilə başlayaraq şəhidlərimizin xatirəsi bir dəqiqəlik sükutla yad olunub.

Tədbirin məqsədi gənclərin şəbəkələşməsi, innovasiya və dayanıqlı inkişaf məqsədləri üzrə bilik mübadiləsini təşviq etməkdir. Forum çərçivəsində açılış çıxışları, panel müzakirələri və komanda quruculuğu oyunları keçirilib. Forum iştirakçıları, dövlət qurumları və innovasiya mərkəzlərinin nümayəndələri bir araya gələrək yeni əməkdaşlıq imkanları müzakirə ediblər.

Açılış panelində layihənin rəhbəri Nigar İsgəndərova çıxış edərək tədbirin mahiyyətini, tədbirdə qonaqları gözləyəcək panel müzakirələr barədə danışıb. Ekologiya və Təbii Sərvətlər Nazirliyinin Nazir Müşaviri Rüstəm Həsənov, Azərbaycan Respublikasının Gənclər Fondunun nümayəndəsi Seyfur Hacımuradov, İnnovasiya və Rəqəmsal İnkişaf Agentliyinin İdarə Heyəti sədrinin müşaviri Vurğun Hacıyev, Aqrar İnnovasiya Mərkəzinin nümayəndəsi Nigar Xıdırova, "INNOLAND" Inkubasiya və Akselerasiya mərkəzinin direktoru Nicat Əmiraslanov və son olaraq, Dəstəkçi İcma Mərkəzinin rəhbəri və “SDG Youth Community” təşəbbüs qrupunun eksperti Etibar Xıdırov çıxışlar edərək forumun açılışında iştirak ediblər.

Forum çərçivəsində ilk olaraq “Rəqəmsal İnkişaf Gündəliyi: İnnovasiya dövründə DİM-lər” mövzusunda panel keçirilib. Panelə Bahçeşehir Universitetinin fəlsəfə doktoru namizədi Mirlazım Dadaşov moderatorluq edib. Müzakirələrdə SABAH.HUB İnnovasiya Mərkəzinin İcma rəhbəri Samir Qədirov, Bakı Dövlət Universitetinin müəllimi Nurlan Əhmədov, “Universal McCann Azerbaijan” Rəqəmsal Media Agentliyinin rəqəmsal media planlayıcısı Tural Rəhimov və İnnovasiya və Rəqəmsal İnkişaf Agentliyinin İdarə Heyəti sədrinin müşaviri Vurğun Hacıyev çıxış edərək rəqəmsal inkişafın DİM-lərə təsirini müzakirələr ediblər.

Daha sonra “Rəqəmsal İnkişaf və idarəetmədə yeni yanaşmalar” mövzusunda ikinci panel təşkil olunub. Bu panelin moderatoru biznesin inkişafı üzrə ekspert Rəşid Bayramlı olub. Paneldə ERP sistemləri üzrə ekspert Aytən Vahidova, nəqliyyat üzrə ekspert Rauf Ağamirzəyev, Sosial Tədqiqatlar Mərkəzinin departament rəhbəri Seymur Əliyev və informasiya texnologiyalarının idarəedilməsi üzrə ekspert Sərxan Talıbzadə iştirak edərək rəqəmsal idarəetmədə tətbiq edilən müasir yanaşmaları təqdim ediblər.

Bütün bunlardan sonra, forum çərçivəsində komanda quruculuğu oyunu da təşkil olunub. Bu sessiyaya ESN Azərbaycanın Milli İdarə Heyətinin üzvü və kommunikasiya meneceri Hünər Alxanov moderatorluq edib. İştirakçılar, həmçinin şəbəkələşmə fasiləsində müxtəlif təşkilatlarla əməkdaşlıq imkanlarını müzakirə ediblər.

Tədbir mükafatlandırma mərasimi və xatirə fotoları ilə başa çatıb.

Azərbaycan Respublikası Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi, Asiya İnkişaf Bankının Azərbaycandakı nümayəndəliyi və Koreya Respublikasının E-Asiya və Bilik Tərəfdaşlığı Fondunun dəstəyilə Gəncə-Daşkəsən iqtisadi rayonunda StartupFest Gəncə proqramına start verilir. Proqramın məqsədi təmiz enerji, kənd təsərrüfatı, təhsil, dövlət sektorunda innovasiyalar istiqamətində startapların formalaşmasıdır. Proqram çərçivəsində startap müsabiqəsinin təşkili, startaplar üçün təlimlərin və akselerasiya proqramının keçirilməsi nəzərdə tutulur.

Proqram üzrə müraciətlər 15 Mart 2023-cü il tarixinə qədər davam edəcək.
Qoşulmaq üçün: https://form.jotform.com/230531646484457