13-15 iyun 2025-ci il tarixlərində Azərbaycan Respublikasının Gənclər və İdman Nazirliyi, Gənclər Fondu, ATGTİ-nin dəstəyi və “Enactus Azərbaycan”ın təşkilatçılığı ilə “Enactus Çempionlar Liqası Simulyasiya Düşərgəsi” baş tutub.

Gənc liderlərin inkişafını hədəfləyən bu xüsusi proqram çərçivəsində iştirakçılar həm nəzəri biliklər, həm də praktiki bacarıqlar əldə edərək sahibkarlıq dünyasına bir addım da yaxınlaşıblar.

Düşərgə müddətində iştirakçılar "İnnovasiyalar Mərkəzi"nin dəstəyi ilə keçirilən sahibkarlıq, innovasiya və layihə idarəetməsi sahələrini əhatə edən müxtəlif təlim və vörkşoplarda iştirak ediblər. Təqdimatçılar sırasında INNOLAND İnkubasiya və Akselerasiya Mərkəzinin müdiri Nicat Əmiraslanov “Sahibkarlıq və İnnovasiya”, “Sosial Sahibkarlığa Giriş” və “Təqdimat və Kommunikasiya” mövzularında çıxış edib. ASAN İnnovativ İnkişaf Mərkəzinin təlimçisi Nofəl Əliyev “Startap Quruculuğunda Süni İntellekt Alətləri” mövzusunu təqdim edib. Layihələrin İdarəedilməsi Departamentinin müdir müavini Ziniddin Babayev isə “Layihə İdarəetməsi və Strategiyası” üzrə təlimlə çıxış edib. Bu sessiyalar sayəsində iştirakçılar aktual biliklərlə yanaşı, komanda işi və strateji yanaşma bacarıqlarını da inkişaf etdiriblər.

Düşərgənin davamında isə "Enactus Milli Yarışı"nın yarımfinal və final mərhələlərinin simulyasiyası təşkil olunub. Komandalar öz layihələrini təqdim edərək rəqabət şəraitində bilik və bacarıqlarını nümayiş etdiriblər.

Simulyasiya nəticələrinə əsasən qalib komandalar:

1-ci yer – Azərbaycan Tibb Universiteti

2-ci yer – Bakı Dövlət Universiteti

3-cü yer – Lənkəran Dövlət Universiteti

Bütün komandaları təbrik edirik! Uğurlarınız davamlı olsun!

“INNOLAND” rezidentləri Azərbaycan Beynəlxalq İnvestisiya Forumunda uğurla təmsil olunub Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin "INNOLAND" İnkubasiya və Akselerasiya Mərkəzinin rezidentləri 1-ci Azərbaycan Beynəlxalq İnvestisiya Forumu çərçivəsində “ASAN xidmət” stendində iştirak ediblər. "Gələcək üçün bacarıqlar” layihəsi müddətində universitetlərlə əməkdaşlıq çərçivəsində formalaşmış "Convitsa", "Dovotes" və Mərkəzin rezidenti olan "Enverson" startapları yerli və xarici ziyarətçilərə innovativ həlləri və layihələri barədə məlumat veriblər. Yüksək səviyyəli qonaqlar və rəsmilər startapların təqdim etdiyi texnoloji yeniliklərlə yaxından tanış olub, onların beynəlxalq bazara çıxış imkanlarını yüksək qiymətləndiriblər. Həmçinin qonaqlar “ASAN xidmət”in fəaliyyəti, vətəndaşlara təqdim olunan innovativ xidmətlər, rəqəmsal həllər sahəsində əldə olunan nailiyyətlər və beynəlxalq əməkdaşlıq imkanları barədə məlumatlandırılıblar. Azərbaycan Beynəlxalq İnvestisiya Forumu Şərq və Qərbin strateji qovşağında yerləşən ölkələrin iqtisadi və texnoloji potensialını nümayiş etdirmək, yeni qlobal rəqabətlilik paradiqmalarına dair bilik və təcrübə mübadiləsi aparmaq üçün mühüm platforma rolunu oynayır. Tədbirdə iştirak edən şirkətlər və startaplar üçün bu forum yüksək səviyyəli əlaqələr qurmaq, strateji sazişlər imzalamaq və yeni tərəfdaşlıqlar formalaşdırmaq baxımından unikal imkanlar yaradıb.

Ekologiya və Təbii Sərvətlər Nazirliyi və BMT-nin İnkişaf Proqramı (BMTİP) mövcud su problemlərinə texnoloji həllər tapmaq və suyun həyati əhəmiyyəti ilə bağlı maarifləndirmə işinə dəstək vermək məqsədilə keçirilən "Aquahack" onlayn hakaton yarışı başa çatıb.
  
Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin "INNOLAND" İnkubasiya və Akselerasiya Mərkəzinin də dəstəkçisi olduğu “Aquahack” 48 saat davam edib. 
 
Münsiflər heyətinin qarşısında öz layihələrini təqdim edən 30 komandadan “Arducoman” komandası ən yüksək bal toplayaraq qalib olub. 2-ci yerə "Aquahackermaks" layihəsi, 3-cü yerə isə "Satetlite" layihəsi layiq görülüb.

Qaliblər 5000, 3000 və 2000 AZN məbləğində mükafat qazanıblar.