"ASAN xidmət" “Take Off İstanbul 2025” startap sammitində

10–11 dekabr 2025-ci il tarixində Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “İnnovasiyalar Mərkəzi”nin nümayəndə heyəti Türkiyə Respublikasının İstanbul şəhərində keçirilən “Take Off İstanbul 2025” beynəlxalq startap sammitində iştirak edib.

“ASAN xidmət”in tərəfdaşı olduğu tədbirdə ölkəmiz Azərbaycan stendi ilə təmsil olunub. Stenddə “İnnovasiyalar Mərkəzi”, ASAN AI Hub, "INNOLAND” İnkubasiya və Akselerasiya Mərkəzinin rezident startapları və yerli innovasiya ekosistemini təmsil edən perspektivli startaplar - “Enverson AI”, “Convitsa”, “Polygraf AI”, “Speakday”, “IOMETE”, “Qmeter”, “Tryverse” və “StarKidStories” təqdim edilib.

İki gün davam edən sammit çərçivəsində Azərbaycan stendi “Baykar” şirkətinin texniki direktoru Selçuk Bayraktar, “Take Off Girişim” Zirvəsinin direktoru İrem Bayraktar Aksakal, habelə investorlar və innovasiya ekosisteminin digər əsas iştirakçıları tərəfindən ziyarət edilib. Startapların fəaliyyəti ilə yaxından tanışlıq olub, qarşılıqlı əməkdaşlıq imkanları müzakirə edilib.

Tədbirin ikinci günü “İnnovasiyalar Mərkəzi”nin direktoru Vüsal Rüstəmov “Take Off İstanbul 2025” çərçivəsində təşkil olunan “Regional startap ekosistemi: Azərbaycan, Banqladeş, Türkiyə” mövzusunda panel müzakirəsində çıxış edib.

Bu il “Take Off İstanbul” sammiti 40 ölkədən 500-dən çox startapı, 250-dən artıq investoru, 75 maraqlı tərəfi və 11 sponsor təşkilatı bir araya gətirib.

Sammit TEKNOFEST çərçivəsində T3 Fondu, Türkiyə Respublikasının Sənaye və Texnologiya Nazirliyi və Prezident Administrasiyasının İnvestisiya və Maliyyə Ofisinin təşəbbüsü ilə təşkil olunaraq regionun ən genişmiqyaslı innovasiya və startap platformalarından biri kimi fəaliyyət göstərir.

Bu platforma innovasiyaların inkişafı üçün əlverişli və maneəsiz mühit formalaşdırmaq məqsədilə sahibkarları, mentorları, vençur kapitalı nümayəndələrini və şirkətləri bir araya gətirir.

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin "INNOLAND" İnkubasiya və Akselerasiya Mərkəzinin rezidenti "Nextsale" "500 Startups" Akselerasiya proqramına qəbul olub.

"500 Startups" daha çox ölkədən innovativ startapları əhatə dairəsinə qatmaq üçün Gürcüstanda akselerasiya proqramına başlayıb. "500 Georgia" proqramı qonşu ölkələrdən ən uğurlu startapları dəstəkləyir. Proqram müddətində "Nextsale" bir çox vacib mövzularda beynəlxalq mütəxəssislərdən böyük təcrübələr əldə etməyi hədəfləyir.

Qeyd edək ki, "500 Startups"ın Gürcüstanda başlatdığı akselerasiya proqramına Azərbaycandan qəbul edilən yeganə startap "Nextsale"dir.

"INNOLAND" İnkubasiya və Akselerasiya Mərkəzi və "Nextstep" İnnovasiya Mərkəzi ölkədə innovasiya fəaliyyətinin davamlılığının təmin olunması, innovativ ideyaların inkişafı, stratap biliklərinin arıtırlması məqsədilə "Pre-inkubasiya" proqramına başlayır.

14 iyun - 2 sentyabr tarixləri ərzində baş tutacaq proqramın ilk mərhələsində startap təsisçilərinə müxtəlif sahələrdən olan mütəxəssislər mentorluq və kouçinq dəstəyi göstərəcək. Sonrakı mərhələdə proqram startapçılara ilkin biliklər verməklə yanaşı, işlək məhsulu (MVP) yaratmaq və satış prosesini qurmaqda kömək edəcək. Burada əsas məqsad ideyanı formalaşdırmaq və onu inkişaf etdirməkdir. Həmçinin proqrama qəbul olunan komandalar proqramın sonuna qədər öz ideyalarına əsaslanan biznes prototipinin hazırlanmasına nail olmalıdırlar.

"Pre-inkubasiya" proqramında komandalar aşağıdakı mövzular üzrə bilik əldə edəcəklər:
1. Biznes modelin hazırlanması və inkişafı;
2. Bazar araşdırması və müştəri problemlərinin yoxlanılması;
3. İlkin işlək məhsulun hazırlanması;
4. İnvestisiya və “Pitch day”.

İndiyə qədər "Pre-inkubasiya" proqramına müraciət etmiş 12 startapdan 5-i proqrama seçilib. Bunlar “Abyss”, “Legal”, “Auto Source”, “Utilix” və “Safavy” startaplarıdır.