Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “INNOLAND” İnkubasiya və Akselerasiya Mərkəzinin rezidenti “Uvodo” 500 000 manat dəyərində investisiya cəlb edib.

“Uvodo”nun toxumöncəsi investisiya raunduna "Xəzər Vençur" mələk investorları rəhbərlik ediblər. Ümumilikdə investisiyada Azərbaycan MBA Klub İnvestorları və həmtəsisçilər iştirak edib və raund ümumi yarım milyon manat (300.000 ABŞ dolları) dəyərində bağlanıb.

“Uvodo” rəqəmsal agentliklər və e-ticarət mühəndisləri üçün nəzərdə tutulan, onların iş prosesini və proqramlaşdırma sürətini artıran e-ticarət qurma platformasıdır. Layihəyə fərdiləşdirmə, məlumatın 3-cü tərəf servislərlə paylaşılması, olduqca yüksək xərc tələb edən texniki dəstək və optimallaşdırma ilə bağlı məhdudiyyətlər daxildir.

Startapın məqsədi proqram mühəndislərinə pərakəndə satışın e-ticarətə keçid prosesini sürətləndirməyə kömək etmək və “Uvodo”nu e-ticarət qurma platformaları arasında mühəndislərin ilk seçiminə çevirməkdir.

Hazırda komandanın diqqəti "Beta" mərhələsindən "Alfa" mərhələsinə qədər məhsulun inkişafını sürətləndirməkdir. Komanda startapa cəlb edilən investisiya ilə “Uvodo”nun əsas funksiyalarını təkmilləşdirəcək və müştərilərinin bilavasitə onlardan tələb etdiyi e-ticarət biznesləri üçün vacib olan beynəlxalq ödəniş həlləri, göndərmə xidmətləri və konversiya alətləri və s. kimi xüsusiyyətləri inkişaf etdirəcək.

“Uvodo” “Nextsale” startapını yaradan və müvəffəqiyyətlə satan təsisçilərin növbəti layihəsidir. “INNOLAND”in məzun rezidenti olan “Nextsale”, e-ticarət mağazaları üçün veb-sayt ziyarətçilərini real müştəriyə çevirən optimallaşdırma proqramıdır. Startapın bütün hissələri Boston mərkəzli “Silversmith Capital Partners” şirkəti tərəfindən satın alınıb.

20 iyun 2023-cü il tarixində “INNOLAND” İnkubasiya və Akselerasiya Mərkəzinin və Next Step İnnovasiya Mərkəzinin birgə təşkil etdiyi inkubasiya proqramlarının məzun startapları üçün mövsümün ilk “Demo Day”i təşkil olunub.

Tədbirdə startap və innovasiya ekosisteminin oyunçuları, təsisçiləri, investorlar və sahənin həvəskarları iştirak ediblər.

İnkubasiya və pre-inkubasiya proqramını bitirən yerli “Speakday”, “Wegros”, “Best.az”, “Alimok”, “Safavy”, “Aybss”, “Utilix”, “Autosource” startapları və Pakistandan olan “Akountmate” startapı investorlar qarşısında çıxış edərək təhsil, kommunal və elektron ticarət sektorunda olan problemlərə həll yolları təklif edən xidmət və məhsullar təqdim ediblər.

5 aylıq inkubasiya proqramı çərçivəsində “Google”, “Dünya Bankı”, “Female Founders”, “European Startup Network”, “GoDaddy” kimi şirkətlərin, “iomete”, “Uvodo”, “WeTravel” kimi startapların və “PAŞA Bank”, “Embawood”, “Risk Company, “Caucasus Ventures” kimi bank və şirkətlərin nümayəndələrindən ibarət yerli və xarici mütəxəssislər tərəfindən təlimlər keçirilib.

Təlimlər UI/UX, biznes, startap, innovasiya və texnologiya mövzularını əhatə edib.

Tədbir ölkədə ekosistem oyunçuları arasında fərqli sahələrdə tətbiq olunan texnologiyalar və innovasiyalar istiqamətində təcrübə mübadiləsi üçün imkan yaradıb.

Proqramın sonunda növbəti inkubasiya proqramı haqqında qısa məlumat verilib.

“EESTech Challenge Baku’25“ müsabiqəsinin qalib komandaları ölkəmizi beynəlxalq finalda təmsil edəcək!

“EESTEC JLC Baku” təşkilatının təşkilatçılığı, “INNOLAND” İnkubasiya və Akselerasiya Mərkəzi, “STEAM Azərbaycan” layihəsi və “Bir Könüllü” Tələbələrin Əməkdaşlığı İctimai Birliyinin dəstəyi ilə "EESTech Challenge Baku’25" müsabiqəsi həyata keçirilib.

Müsabiqənin əsas məqsədi mühəndislik sahəsində təhsil alan və bu istiqamətdə bilik və bacarığını inkişaf etdirmək istəyən tələbələr üçün real problemlərin həlli üzrə innovativ düşüncə və texniki yanaşmaların təşviq olunmasıdır.

Müsabiqəyə 100-dən çox müraciət daxil olmuş, onlardan seçilmiş 10 komanda – ümumilikdə 30 iştirakçı müxtəlif texnoloji problemlərin yaradıcı yollarla həlli istiqamətində bilik və bacarıqlarını nümayiş etdirib. Nəticədə "AirVive" komandası birinci, "Montyorlar" komandası isə ikinci yerə layiq görülmüşdür.

Qalib komandalar 13–16 may 2025-ci il tarixlərində İtaliyanın Trieste şəhərində keçiriləcək "EESTech Challenge" beynəlxalq final mərhələsində Azərbaycanı təmsil edəcəklər.

Qeyd edək ki, "EESTech Challenge" Avropanın müxtəlif şəhərlərində keçirilən beynəlxalq müsabiqə formatıdır və gənc texnologiya həvəskarları arasında mühəndislik və innovasiyaların inkişafını təşviq edir.