Gənclərin 2-ci Şəbəkələşmə forumu baş tutub

31 avqust 2025 tarixində "INNOLAND" İnkubasiya və Akselerasiya mərkəzində “Gənclər Dayanıqlı İnkişaf Məqsədləri naminə: Gənclərin ikinci Şəbəkələşmə Formu" açılış mərasimi ilə başlayıb. Tədbir Azərbaycan Respublikasının Dövlət Himni ilə başlayaraq şəhidlərimizin xatirəsi bir dəqiqəlik sükutla yad olunub.

Tədbirin məqsədi gənclərin şəbəkələşməsi, innovasiya və dayanıqlı inkişaf məqsədləri üzrə bilik mübadiləsini təşviq etməkdir. Forum çərçivəsində açılış çıxışları, panel müzakirələri və komanda quruculuğu oyunları keçirilib. Forum iştirakçıları, dövlət qurumları və innovasiya mərkəzlərinin nümayəndələri bir araya gələrək yeni əməkdaşlıq imkanları müzakirə ediblər.

Açılış panelində layihənin rəhbəri Nigar İsgəndərova çıxış edərək tədbirin mahiyyətini, tədbirdə qonaqları gözləyəcək panel müzakirələr barədə danışıb. Ekologiya və Təbii Sərvətlər Nazirliyinin Nazir Müşaviri Rüstəm Həsənov, Azərbaycan Respublikasının Gənclər Fondunun nümayəndəsi Seyfur Hacımuradov, İnnovasiya və Rəqəmsal İnkişaf Agentliyinin İdarə Heyəti sədrinin müşaviri Vurğun Hacıyev, Aqrar İnnovasiya Mərkəzinin nümayəndəsi Nigar Xıdırova, "INNOLAND" Inkubasiya və Akselerasiya mərkəzinin direktoru Nicat Əmiraslanov və son olaraq, Dəstəkçi İcma Mərkəzinin rəhbəri və “SDG Youth Community” təşəbbüs qrupunun eksperti Etibar Xıdırov çıxışlar edərək forumun açılışında iştirak ediblər.

Forum çərçivəsində ilk olaraq “Rəqəmsal İnkişaf Gündəliyi: İnnovasiya dövründə DİM-lər” mövzusunda panel keçirilib. Panelə Bahçeşehir Universitetinin fəlsəfə doktoru namizədi Mirlazım Dadaşov moderatorluq edib. Müzakirələrdə SABAH.HUB İnnovasiya Mərkəzinin İcma rəhbəri Samir Qədirov, Bakı Dövlət Universitetinin müəllimi Nurlan Əhmədov, “Universal McCann Azerbaijan” Rəqəmsal Media Agentliyinin rəqəmsal media planlayıcısı Tural Rəhimov və İnnovasiya və Rəqəmsal İnkişaf Agentliyinin İdarə Heyəti sədrinin müşaviri Vurğun Hacıyev çıxış edərək rəqəmsal inkişafın DİM-lərə təsirini müzakirələr ediblər.

Daha sonra “Rəqəmsal İnkişaf və idarəetmədə yeni yanaşmalar” mövzusunda ikinci panel təşkil olunub. Bu panelin moderatoru biznesin inkişafı üzrə ekspert Rəşid Bayramlı olub. Paneldə ERP sistemləri üzrə ekspert Aytən Vahidova, nəqliyyat üzrə ekspert Rauf Ağamirzəyev, Sosial Tədqiqatlar Mərkəzinin departament rəhbəri Seymur Əliyev və informasiya texnologiyalarının idarəedilməsi üzrə ekspert Sərxan Talıbzadə iştirak edərək rəqəmsal idarəetmədə tətbiq edilən müasir yanaşmaları təqdim ediblər.

Bütün bunlardan sonra, forum çərçivəsində komanda quruculuğu oyunu da təşkil olunub. Bu sessiyaya ESN Azərbaycanın Milli İdarə Heyətinin üzvü və kommunikasiya meneceri Hünər Alxanov moderatorluq edib. İştirakçılar, həmçinin şəbəkələşmə fasiləsində müxtəlif təşkilatlarla əməkdaşlıq imkanlarını müzakirə ediblər.

Tədbir mükafatlandırma mərasimi və xatirə fotoları ilə başa çatıb.

Fintex startapları üçün “Xüsusi tənzimləmə rejimi” mövzusunda görüş keçirildi

Azərbaycan Respublikasının Mərkəzi Bankı və “INNOLAND” İnkubasiya və Akselerasiya Mərkəzinin birgə təşkilatçılığı ilə fintex ekosistemi üçün mühüm əhəmiyyət daşıyan “Xüsusi tənzimləmə rejimi” mövzusunda görüş uğurla keçirildi.

Təqdimat zamanı xüsusi tənzimləmə rejiminin məqsədi, müraciətlərin qiymətləndirilməsi meyarları və sınaq prosesi ilə bağlı ətraflı məlumatlar təqdim olunaraq bu istiqamətdə geniş müzakirələr aparılıb. Sessiya fintex sahəsində fəaliyyət göstərən startaplar üçün həm maarifləndirici, həm də praktiki baxımdan faydalı müzakirələrlə yadda qaldı.

Spikerlər:

• Sahib Həsənov – Azərbaycan Respublikasının Mərkəzi Bankı, şöbə rəisi

• Vaqif Quliyev – Azərbaycan Respublikasının Mərkəzi Bankı, aparıcı mütəxəssis

Görüşdə fintex ekosistemi üçün mövcud imkanlar, normativ tələblər, innovasiyaların tənzimlənməsi və gələcək əməkdaşlıq perspektivləri ətrafında geniş fikir mübadiləsi aparıldı. İştirakçılar üçün sual-cavab sessiyası da təşkil olundu və sahə üzrə aktual məsələlər ətraflı şəkildə izah edildi.

7-8 oktyabr 2023-cü il tarixində Azərbaycan Respublikasının Prezidenti yanında Vətəndaşlara Xidmət və  Sosial İnnovasiyalar üzrə Dövlət Agentliyinin “İnnovasiyalar Mərkəzi”nin təşkilatı dəstəyi ilə Azərbaycan Robotexnika Mühəndisliyi Akademiyası tərəfindən "INNOLAND" İnkubasiya və Akselerasiya Mərkəzində “NASA Space Apps Challenge” hakatonu keçirilib.
 
Açılış mərasimində  “İnnovasiyalar Mərkəzi”nin direktoru Vüsal Rüstəmov, Rəqəmsal İnkişaf və Nəqliyyat Nazirliyi yanında Kosmik Agentliyin ("Azərkosmos") Strategiya və biznesin inkişafı departamentinin direktoru Natəvan Həsənova, Azərbaycan Kibertəhlükəsizlik Təşkilatları Assosiasiyasınının idarə heyətinin sədr müavini Rauf Cabbarov,  “NASA Space Apps Baku”nun layihə rəhbəri Nigar Rəsulzadə və digər qonaqlar iştirak ediblər.
 
Hakatonun məqsədi qlobal əhəmiyyətli prioritet istiqamətlərdə qeyd olunan mövzulara dair açıq mənbəli həllər yaratmaqdır. Eyni zamanda müvafiq sahələrin elmi tədqiqinə maraq oyatmaq, yeni nəsil alimlərin, texnoloqların, dizaynerlərin və mühəndislərin böyüməsini və müxtəlifliyini təşviq etmək əsas hədəflərdir.
 
Müsabiqədə 690 müraciətçidən müsabiqə üsulu ilə seçilmiş 23 komanda iştirak edib. Tələblərə cavab verən və 14 yaşdan yuxarı 3-4 nəfər üzvdən ibarət komandalar 36 saat ərzində hakatonun əsas mövzuları olan iqlimin idarəolunması, təhsil texnologiyaları, yanğınların idarəolunması, virtual və artırılmış reallıqlar, sosial layihələr istiqamətlərində tapşırıqları həll ediblər.
 
Yekunda  komandaların təqdimatlarına əsasən qiymətləndirmələr aparılacaq,  orijinallığı, konseptləri,  ixtiraçılığı ilə fərqlənən, yaradıcı problem həlli və qeyri-standart düşünmə nümayiş etdirən həllər 3 yer üzrə qiymətləndiriləcək və müvafiq olaraq mükafatlandırılacaqlar. Ölkə üzrə qalib gələn komandalar dünyanın 350 şəhərində keçirilmiş hakaton qalibləri ilə birgə yarışacaqlar.