"INNOLAND"in rezidenti koronavirusla bağlı çatbot yaradıb
31 Mart, 2020

"INNOLAND"in rezidenti koronavirusla bağlı çatbot yaradıb

"INNOLAND" İnkubasiya və Akselerasiya Mərkəzinin rezidenti  "Botbox"​ tərəfindən regionda ilk dəfə doğma dilimizdə "COVID-19" ilə bağlı çatbot "WhatsApp" və "Facebook Messenger​" üzərindən istifadəyə verilib.

Çatbot 24/7 rejimində insan müdaxiləsinə ehtiyac olmadan vətəndaşlarımızı dünyada və ölkədə koronavirusla bağlı olan statistik məlumatlarla real zamanda tanış edir. Bu məlumatlar rəsmi qaynaqlardan APİ-lər vasitəsi ilə toplanır, WhatsApp və ya Facebook bildirişi şəklində təqdim olunur.

Həmçinin, Botbox çatbotu pandemiyadan qorunmaq üçün gündəlik diqqət olunması vacib sayılan məsləhətləri, məsafədən effektiv çalışmaq üçün faydalı olacaq internet resurslar haqqında məlumatları da əhalinin şəxsi və iş məqsədi ilə ən çox istifadə etdiyi iki tətbiq üzərindən onlarla bölüşür.

Qeyd edək ki, mesajlaşma və sosial şəbəkə tətbiqləri həyatımıza ən çox nüfüz edən rəqəmsal platformalar olduğundan, məhz bu tətbiqlər üzərindən böyük kütlə ilə kommunikasiya qurmaq çox effektiv sayılır. Buna görə də Dünya Səhiyyə Təşkilatı və Facebook tərəfindən birgə hazırlanmış COVID-19 ingilisdilli çatbotu bir neçə gün ərzində miliyonlarla insan tərəfindən istifadə edilib. 

Azərbaycan da regionun ən sürətli rəqəmsallaşan iqtisadiyyatlarından birinə sahib olan ölkə kimi innovativ texnologiyaların sosial və biznes yönümlü faydalarından yararlanmağı hər zaman aktual saxlamışdır.

Təsadüfi deyil ki, bu çatbotu ərsəyə gətirən ​Botbox startapı Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “INNOLAND” İnkubasiya və Akselerasiya mərkəzinin rezidentidir.

COVID-19 WhatsApp botu​ ​| ​Messenger botu üçün kliklə

 

Ətraflı oxu

Digər xəbərlər

innoland news image

230 gəncin iştirakı ilə V “TUSİ” inkubasiya proqramına start verildi

230 gəncin iştirakı ilə V “TUSİ” inkubasiya proqramına start verildi!
 
Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin İnnovasiyalar Mərkəzi tərəfindən həyata keçirilən “Gələcək üçün bacarıqlar” layihəsi çərçivəsində V “TUSİ” inkubasiya proqramına start verilib.
Proqramın ilk günü iştirakçılar tərəfindən böyük maraqla qarşılanıb. Açılış tədbirində 230-a yaxın gəncin iştirakı qeydə alınıb.
Proqram çərçivəsində ilk təlim “Fikrin inkişaf etdirilməsi və təsdiqlənməsi” mövzusunda təşkil olunub. Təlim zamanı iştirakçılara ideyaların formalaşdırılması, inkişaf potensialının qiymətləndirilməsi, düzgün istiqamətin müəyyənləşdirilməsi və ilkin mərhələdə yaranan çətinliklərin aradan qaldırılması ilə bağlı nəzəri və praktiki biliklər təqdim edilib.
Proqramın əsas məqsədi iştirakçıların startap ideyalarını inkişaf etdirərək bazara çıxarıla biləcək səviyyəyə çatdırmaq, eyni zamanda onları mentorluq, ekspert dəstəyi və şəbəkələşmə imkanları ilə təmin etməkdir.
V “TUSİ” inkubasiya proqramına layihənin veb platforması vasitəsilə 600 nəfər qeydiyyatdan keçib. Seçilmiş iştirakçılar 10 əsas mövzu və 34 alt modulu əhatə edən intensiv təlim proqramına cəlb olunacaqlar.
“Gələcək üçün bacarıqlar” layihəsi innovasiya sahəsində kadr potensialının gücləndirilməsi, gənclərin ideyalarının inkişafına dəstək göstərilməsi və onların ölkənin texnoloji inkişafına töhfə verəcək istiqamətlərə yönləndirilməsini hədəfləyir.
Ətraflı oxu
innoland news image

“ASAN xidmət”in nümayəndə heyəti Ankarada səfərdə olub

23-26 yanvar 2023-cü il tarixində Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin nümayəndə heyəti Türkiyənin Ankara şəhərində səfərdə olub.

Səfər çərçivəsində nümayəndə heyəti “Havelsan Texnoloji Radar” şirkəti, “ODTÜ Teknokent”, “OSTİM Teknokent”, “Ankara Universiteti Teknokent” və “Bilkent Cyberpark”la qarşılıqlı müzakirələrin aparılması məqsədilə görüşlər keçirib. 

Görüşlərdə Dövlət Agentliyinin fəaliyyəti, “ASAN xidmət”, “İnnovasiyalar Mərkəzi” və “INNOLAND” İnkubasiya və Akselerasiya Mərkəzi haqqında geniş məlumat verilib, ölkəmizdə startap ekosisteminin inkişafı və biznes mühitinin gücləndirilməsi istiqamətində görülən işlərdən danışılıb. Həmçinin bu istiqamətdə birgə əməkdaşlıq imkanları müzakirə edilib. 

“ODTÜ Teknokent”, “Bilkent Cyberpark” və “INNOLAND” İnkubasiya və Akselerasiya Mərkəzi arasında Əməkdaşlığa dair Memorandum imzalanıb.

Memorandumun əsas məqsədi hər iki ölkədə startapların böyüməsini təmin etmək, yerli bazarda böyümək istəyən sahibkarları qarşılıqlı dəstəkləmək, bu sahədə tədqiqat və inkişaf işləri aparmaqdır. Eyni zamanda qeyd olunan işlərin icrası üçün zəruri infrastrukturun yaradılması, startap ekosisteminə töhfə verəcək birgə layihələrin həyata keçirilməsi nəzərdə tutulur.

Ətraflı oxu
innoland news image

Dövlət Agentliyinin sədri Ülvi Mehdiyev Türkiyə Respublikası "Teknopark İstanbul"un Baş İcraçı Direktoru Bilal Topçu ilə görüşüb

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev Türkiyə Respublikası "Teknopark İstanbul"un Baş İcraçı Direktoru Bilal Topçu ilə görüşüb.

Ülvi Mehdiyev Dövlət Agentliyinin fəaliyyət istiqamətləri, dövlət xidmətlərinin göstərilməsində innovasiyaların tətbiqi, elektron hökümətin inkişafı və sosial innovasiyalar sahəsində görülən işlər barədə məlumat verib. Dövlət Agentliyi ilə “Teknopark İstanbul" arasında innovasiya sahəsində birgə fəaliyyətin qurulmasının iki qardaş ölkə arasında yeni əməkdaşlıq imkanlarının açdığını qeyd edib.

Bundan əlavə Dövlət Agentliyinin 2015-ci ildə Birləşmiş Millətlər Təşkilatının Dövlət Xidmətləri Mükafatına, 2019-cu ildə isə BMT-nin rəqəmsal idarəetmənin tətbiqi ilə dövlət xidmətlərinin inkişafı sahəsində xüsusi mükafatına layiq görülməsi diqqətə çatdırılıb.

Sonra qonaq “INNOLAND” İnkubasiya və Akselerasiya Mərkəzinin fəaliyyəti ilə tanış olub və 30-dan artıq startap nümayəndəsi ilə görüşüb.

Görüş çərçivəsində Bilal Topçu Azərbaycan startapları üçün "Teknopark İstanbul"da mövcud olan imkanlar, dəstək və xidmətlərlə bağlı təqdimatla çıxış edib və yerli startapçıların innovativ sahibkarlığın inkişafı ilə bağlı fikirlərini dinləyib və suallarını cavablandırıb.

Ətraflı oxu