“GameJamPlus 2026” beynəlxalq oyun hakatonunun ölkə mərhələsi keçirilib

16–18 oktyabr tarixlərində “INNOLAND” İnkubasiya və Akselerasiya Mərkəzində “Gamepons” və “IGDA Azerbaijan”ın təşkilatçılığı, “INNOLAND”ın dəstəyi ilə “GameJamPlus 2026” beynəlxalq oyun hakatonunun Azərbaycan mərhələsi keçirilib.

Hakatonda 90-dan çox iştirakçı 23 komandada 48 saat ərzində oyun prototipləri hazırlayıb. Komandalar “Better Together”, “One More Time” və “Something’s Off” mövzularından birini seçərək oyun ideyalarını işləyib hazırlayıblar. Tədbirin sonunda 19 komanda öz oyunlarını münsiflər heyətinə təqdim edib.

İştirakçıların hazırladıqları oyunlar münsiflər heyəti tərəfindən sınaqdan keçirilib və “HackathonHost” platforması üzərindən qiymətləndirilib. Nəticələrinə əsasən, “Keep Locking” oyunu ilə “Clockwork” komandası Azərbaycan mərhələsinin qalibi olub. Oyunlarını təqdim edən 19 komandanın hamısı “GameJamPlus” proqramının növbəti mərhələsinə vəsiqə qazanıb.

“GameJamPlus” dünyanın 35 ölkəsindən oyun tərtibatçılarını bir araya gətirən beynəlxalq proqramdır. Proqram 48 saatlıq hakatonla başlayır, daha sonra inkubasiya, qitə yarımfinalları, akselerasiya və qlobal final mərhələləri ilə davam edir. Bu mərhələlərdə komandalar oyun layihələrini təkmilləşdirmək və beynəlxalq səviyyədə təqdim etmək imkanı əldə edirlər.

Hakatona qeydiyyat “HackathonHost” platforması üzərindən aparılıb.

“INNOLAND” İnkubasiya və Akselerasiya Mərkəzi iştirakçılara oyun ideyalarını prototiplərə çevirmək, layihələri üzərində işləmək və yaradıcılıq potensiallarını nümayiş etdirmək üçün şərait yaradıb.

“INNOLAND” İnkubasiya və Akselerasiya Mərkəzi”nin dəstəyi ilə “Sənin ideyan dəstəklənir” şüarı altında həyata keçirilən SİD layihəsinin açılış mərasimi keçirilib.

SİD layihəsi yaradıcı təşəbbüslərin inkişafına təkan verməklə yanaşı, OBA-da əməliyyatların optimallaşdırılmasına, innovativ həllərin tətbiqinə və ümumilikdə Azərbaycanın startap ekosisteminin şaxələndirilməsinə xidmət edir.

Açılış mərasimində Veysəloğlu Şirkətlər Qrupunun rəhbər şəxsləri və Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “İnnovasiyalar Mərkəzi”nin direktoru Vüsal Rüstəmov iştirak ediblər.

Vüsal Rüstəmov sözügedən layihə ilə bağlı bildirib ki, seçilmiş 33 startap üçün effektiv inkubasiya mühitinin formalaşdırılması məqsədilə "İnnovasiyalar Mərkəzi" öz resurslarını paylaşmağa hazırdır. Bu əməkdaşlıq dövlət və özəl sektor tərəfdaşlığının parlaq nümunəsidir və biz OBA-nın təşəbbüsünü yüksək qiymətləndiririk.

Qeyd edək ki, müvafiq layihəyə ümumilikdə 183 komanda müraciət edib. Onların arasından 33 ən perspektivli komanda növbəti mərhələyə seçilib.

Layihə çərçivəsində ümumilikdə 10,000 manatlıq mükafat fondu nəzərdə tutulub.

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev Türkiyə Respublikası "Teknopark İstanbul"un Baş İcraçı Direktoru Bilal Topçu ilə görüşüb.

Ülvi Mehdiyev Dövlət Agentliyinin fəaliyyət istiqamətləri, dövlət xidmətlərinin göstərilməsində innovasiyaların tətbiqi, elektron hökümətin inkişafı və sosial innovasiyalar sahəsində görülən işlər barədə məlumat verib. Dövlət Agentliyi ilə “Teknopark İstanbul" arasında innovasiya sahəsində birgə fəaliyyətin qurulmasının iki qardaş ölkə arasında yeni əməkdaşlıq imkanlarının açdığını qeyd edib.

Bundan əlavə Dövlət Agentliyinin 2015-ci ildə Birləşmiş Millətlər Təşkilatının Dövlət Xidmətləri Mükafatına, 2019-cu ildə isə BMT-nin rəqəmsal idarəetmənin tətbiqi ilə dövlət xidmətlərinin inkişafı sahəsində xüsusi mükafatına layiq görülməsi diqqətə çatdırılıb.

Sonra qonaq “INNOLAND” İnkubasiya və Akselerasiya Mərkəzinin fəaliyyəti ilə tanış olub və 30-dan artıq startap nümayəndəsi ilə görüşüb.

Görüş çərçivəsində Bilal Topçu Azərbaycan startapları üçün "Teknopark İstanbul"da mövcud olan imkanlar, dəstək və xidmətlərlə bağlı təqdimatla çıxış edib və yerli startapçıların innovativ sahibkarlığın inkişafı ilə bağlı fikirlərini dinləyib və suallarını cavablandırıb.