"ASAN xidmət"in 3-cü “RoboCode” düşərgəsi başa çatıb.

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “İnnovasiyalar Mərkəzi”nin, “Bilişim Vadisi”nin və “SAHA Robotics” şirkətinin birgə təşkilatçılığı, Expressbankın sponsorluğu ilə həyata keçirilən “RoboCode III” robotik kodlama düşərgəsi yekunlaşıb. Bağlanış tədbirində “İnnovasiyalar Mərkəzi”nin direktoru Vüsal Rüstəmov, “Bilişim Vadisi”nin baş icraçı direktorunun müavini Tuba Öztepe, ekosistemin inkişafı üzrə mütəxəssis Nida Emin Kirişçi, “SAHA Robotics” şirkətinin Robototexnika davranış və naviqasiya sistemləri rəhbəri Burak Can Kaya, düşərgə iştirakçıları və digər qonaqlar iştirak ediblər. Düşərgə müddətində formalaşan və final mərhələsinə keçən 5 komandanın hazırladığı prototiplər münsiflər heyəti tərəfindən qiymətləndirilib. Qaliblər “SAHA Robotics” şirkətində təcrübə proqramında iştirak etmək, “Bilişim Vadisi”ndə 1 illik ofis imkanından yararlanmaq hüququ qazanıblar. Bundan əlavə, layihəsini tam şəkildə inkişaf etdirərək tamamlayan qalib komanda “Take Off İstanbul” startap sammitində iştirak imkanı əldə edəcək. Bir ay davam edən düşərgəyə ümumilikdə 150-dən çox müraciət daxil olub və kriteriyalara əsasən seçilmiş 105 iştirakçıya onlayn və fiziki formatda təlimlər keçirilib. Təlim proqramına “ROS 2-in əsasları”, “SLAM alqoritmləri”, “ROS 2 alətləri və Gazebo-da fərdi mühitin yaradılması” kimi texnoloji mövzularla yanaşı, sahibkarlıq və komanda quruculuğu istiqamətində təlimlər də daxil olub. 2023-cü ildən bəri təşkil olunan və bu il üçüncüsü gerçəkləşən düşərgələrə ümumilikdə 924 müraciət qəbul edilib, 300-dən artıq müraciətçi yarışmada iştirak hüququ qazanıb. Düşərgə 2023-cü ildə “İnnovasiyalar Mərkəzi” ilə “Bilişim Vadisi Bakı” arasında imzalanmış əməkdaşlıq protokolu çərçivəsində həyata keçirilir. Məqsəd avtonom sistemlərə, robototexnika və avtomatlaşdırma texnologiyalarına çıxışı asanlaşdırmaq, bu sahədə ixtisaslaşmaq və karyera qurmaq istəyən gəncləri “ROS” (Robot Operating System) ekosisteminə dair bilik və bacarıqlarla təmin etməkdir. İnnovativ həllərin təşviqi ilə iştirakçılara bu sahədə layihələrini inkişaf etdirməyə dəstək göstərmək də prioritet istiqamətlərdəndir.

Kibertəhlükəsizlik həftəsi çərçivəsində kiber startapların təşviqi məqsədi ilə Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “INNOLAND” İnkubasiya və Akselerasiya Mərkəzində Nəqliyyat, Rabitə və Yüksək Texnologiyalar Nazirliyinin təşəbbüsü ilə Kibertech startapçıları və kibertəhlükəsizlik üzrə ekspertlər ilə görüş keçirilib.

Görüş zamanı spiker qismində çıxış edən Guy Zbarsky, Toğrul Səmədov və Rəşad Əliyev kiber startapların qurulması və kibertəhlükəsizlik tədbirlərinin düzgün şəkildə həyata keçirilməsi haqqında ətraflı məlumat veriblər.

Ölkəmizdə startap ekosisteminin formalaşması və inkişafı prossesi sürətlə davam edir. 

Ölkə rəhbərliyinin tapşırıqlarına uyğun olaraq startapların və innovasiyalı müəssisələrin inkişafını stimullaşdırmaq, effektiv koordinasiyanı  təmin etmək, ekosistem oyunçularına dəstək tədbirlərini genişləndirmək və yerli startaplara investisiya imkanlarını artırmaq  məqsədilə “İNNOLAND” İnkubasiya və Akselerasiya Mərkəzində “İNNOKLUB”un yaradılması ilə bağlı kollektiv sazişin imzalanması mərasimi keçirilib. 

Qeyd edək ki, "İNNOKLUB" ekosistemin əsas oyunçuları olan “İnnovasiyalar Mərkəzi”, “NextStep”, “Yeni Fikir”, “Lotfi Zadeh Texnologiya Mərkəzi”, “New Space”, "IBA İnnovasiya Mərkəzi”, “Tech.az”, “Technovate”, “Paşa Holding” şirkətlərinin təşəbbüsü ilə yaradılıb.

Tədbirdə qonaq qismində dəvət olunmuş "500 Startups” şirkətinin  regional direktoru Arianne Dilts görüş iştirakçılarının innovativ texnoloji sahibkarlığın inkişafı istiqamətində səylərini yüksək qiymətləndirərək klubun gələcək fəaliyyətinə uğurlar arzu ediblər.

“İNNOKLUB” üzvlərinin fəaliyyətini əlaqələndirmə və katiblik funksiyasını “İnnovasiyalar Mərkəzi” yerinə yetirəcək.