“INNOLAND” İnkubasiya və Akselerasiya Mərkəzinin nümayəndə heyəti Avropa İttifaqının maliyyələşdirdiyi, BMTİP (UNDP Azerbaijan) tərəfindən icra olunan “Lənkəran-Astara iqtisadi rayonunda meyvə-tərəvəz sektorunda rəqabət qabiliyyətinin, əməkdaşlığın və müasirləşmənin təşviqi" layihəsi çərçivəsində SUP.VC şirkətinin təşkilatçılığı ilə Lənkəran şəhərində 3 gün davam edən aqrar sahə üzrə ideatonda iştirak edib.Tədbirdə münsiflər heyətinin üzvü qismində iştirak edən “INNOLAND” nümayəndəsi tədbir iştirakçılarına Mərkəzin ümumi fəaliyyəti haqqında danışaraq, innovasiya və startap  ekosistemin təkmilləşdirilməsi sahəsində həyata keçirilən layihələr, yerli startapların qlobal səviyyədə sərmayə cəlbi, böyüməsi və inkişafı üçün yaradılan fürsətlərlə bağlı məlumat verib. 

“Ideathon on Agrinnovation” müsabiqəsində Azərbaycanın müxtəlif regionlarından olan gənclərdən ibarət 18 komanda meyvə-tərəvəzin yetişdirilməsi və emalı ilə bağlı 2 istiqamətdə öz innovativ ideyalarını irəli sürüblər. Sonda qalib olan “İnnovet”, “Zəfər” və “Victory” komandaları üzvlərinə sertifikatlar təqdim olunub. İlk 2 yerin qalibləri həmçinin  “INNOLAND” İnkubasiya və Akselerasiya Mərkəzində 3 aylıq inkubasiya xidməti keçmək şansı əldə ediblər.

Qeyd edək ki, aqrar sahə üzrə keçirilən müsabiqənin əsas məqsədi meyvə-tərəvəzlərin yetişdirilməsi və emalında yenilikləri, innovasiyaları tətbiq etmək, qabaqcıl ideyalara dəstək göstərmək və təşviq etmək olub. 

“INNOLAND” İnkubasiya və Akselerasiya Mərkəzi” və “Bank Respublika”nın birgə İnkubasiya proqramı çərçivəsində “Fintech Meetup” keçiriləcək. Meetup, “SUP Akselerator”unun ənənəvi #SUPTalks tədbiri daxilində baş tutacaq. Görüşdə Şefket Sayalıoğlu müasir səyahət, maliyyə texnologiyaları və innovativ maliyyə sektorunun inkişaf tendensiyasından danışacaq.

Şefket Sayalıoğlu, Səyahət-Fintex sahəsində olan “SwayPay” şirkətinin həmtəsisçisi və eyni zamanda baş direktorudur. “SwayPay” şirkəti 2017-ci ildə qurulub. Şirkətin əsas məqsədi otellərə daha çox gəlir qazandırmaq üçün sürətli, təhlükəsiz sifariş rəsmiləşdirilmələri və ödənişləri həyata keçirməkdir.

Tədbir zamanı həmçinin birgə inkubasiya proqramının detalları və son yenilikləri müzakirə olunacaq.

Tədbir, 20 sentyabr saat 16.00-da “INNOLAND” İnkubasiya və Akselerasiya Mərkəzində keçiriləcəkdir.

COVID-19 pandemiyası bütün sahələrə ziyan vurub. Bunun da həlli innovasiyadadır. Bu innovativ həllər haqqında beynəlxalq jurnallar da yazır. Azərbaycan startap ekosistemi də öz növbəsində dünyaya innovativ təkliflər verir. 

Bu ilin əvvəlində ölkəmizdə keçirilmiş “Hack Cov-19” tədbirinin səs-sorağı dünyanın ən məşhur biznes-innovasiya medialarından da gəlir. Belə medialardan biri “Forbes” jurnalıdır. “Forbes’un yeni məqaləsində pandemiya zamanı dünyada tətbiq olunmuş innovativ həllər haqqında danışılır və məqaləninin daxilində yerli akselerasiya mərkəzi “SUP.VC” şirkətinin təşkil etdiyi “Hack Cov-19” qeyd olunub. Tədbir “Forbes” jurnalında aşağıdakı kimi qeyd olunub: 

“Hətta Avrasiyadan Azərbaycan pandemiya zamanı bir-birlərinə daha yaxşı dəstək olmaq üçün ictimaiyyətə kömək etmək məqsədi ilə Qlobal Virtual Hakatona ev sahibliyi etdi və Polşa komandası qalib oldu”

"Tədbir elə böyük bir təzyiq altında baş verdi ki, bir ay belə hazırlaşmadan qlobal ictimaiyyətin mübarizəsinə kömək etmək üçün əla qərarlar qəbul edə bildik" tədbirin təşkilatçısı və SUP.az-ın icraçı direktoru Vüsal Kərimli bildirdi.

Qeyd edək ki, təşkil olunmuş “Hack Cov-19” adlı hakatonda 45 ölkədən 600-dan çox müraciətçi iştirak etmişdi. 

2015-ci ildə qurulan “SUP.VC” şirkəti startaplara xarici və yerli mentorlar vasitəsi ilə  məhsulu inkişaf etdirilməsində, müştəri bazası toplamaqda, investorların cəlbində kömək edən startap akseleratorudur. Qlobalda 38 mentoru olan və 22 startap şirkətində paya sahib olan şirkət 12 beynəlxalq hackatona ev sahibliyi edib. 2020-ci ildən etibarən şirkət həm Budapeşt, həm də Tallində Avropa ofisini açıb və xidmətlərini daha da genişləndirir.